Në Hagë të Holandës ka nisur protesta në mbështetje të ish-krerëve të Ushtrisë Çlirimtare të Kosovës (UÇK) të cilët po gjykohen nga Gjykata Speciale.
Në protestën e organizuar nga ish-ushtarë të UÇK-së që jetojnë në mërgatë e cila është përkrahur edhe nga OVL e UÇK-së po marrin pjesë shqiptarë nga vendet të ndryshme të Evropës, por edhe nga Shtetet e Bashkuara të Amerikës ku jetojnë.
Numër i madh i qytetarëve për në Holandë kanë udhëtuar edhe nga Kosova si dhe disa figura politike.
Protestuesit kanë përgatitur pankartat përmes së cilave do të përcjellin mesazhet e tyre.
Të gjitha mesazhet do të jenë në gjuhën angleze pasi që ato janë të dedikuara për Gjykatën Speciale që është më staf tërësisht ndërkombëtar, dhe Bashkimin Evropian si financues i këtij institucioni. Disa autobusë janë nisur edhe nga Kosova.
Kjo protestë, përmes së cilës kërkohet drejtësi, vjen vetëm një ditë para se të nis dëgjimi i dëshmitarit të parë të mbrojtjes së ish-krerëve të UÇK-së.
Në sallën e gjyqit nesër, më 15 shtator në mbrojtje të ish-presidentit Hashim Thaci pritet të paraqitet James Rubin, amerikani i cili gjatë luftës në Kosovë ka qenë ndihmës sekretar i Shtetit. Pas tij do të ketë edhe dëshmitarë të tjerë që janë figura nga Shtetet e Bashkuara dhe Britania.
