Operacionet Speciale të Forcës së Sigurisë së Kosovës (FSK), në bashkëpunim me ekipin CMSE të Ushtrisë Amerikane dhe Komunën e Drenasit kanë organizuar Ushtrimin në Tavolinë (TTX) me qëllim testimin e koordinimit institucional dhe reagimit ndaj situatave emergjente.
Në ushtrim kanë marrë pjesë përfaqësues të institucioneve lokale dhe qendrore, të cilët zhvilluan një skenar simulues për përballjen me vërshime në territorin e Komunës së Drenasit.
Gjatë aktivitetit janë testuar mekanizmat e koordinimit ndërinstitucional, proceset e vendimmarrjes, komunikimi dhe menaxhimi i burimeve në raste emergjente.
“Pjesëtarët e FSK-së prezantuan praktikat më të mira në fushën e menaxhimit të krizave dhe reagimit ndaj emergjencave”, thuhet në njoftim.
Kryetari i Komunës së Drenasit, Ramiz Lladrovci, ka theksuar rëndësinë e përgatitjes dhe bashkëpunimit ndërinstitucional për mbrojtjen e jetës dhe pronës së qytetarëve.
Sipas FSK-së, ushtrimi ka shërbyer për identifikimin e sfidave, rritjen e gatishmërisë institucionale dhe forcimin e bashkëpunimit ndërmjet institucioneve përgjegjëse për menaxhimin e emergjencave.
“Aktiviteti synon të kontribuojë në ngritjen e kapaciteteve për reagim të koordinuar dhe efikas ndaj situatave të krizës”, theksohet në fund të njoftimit./teve1.info/
