Pllaka e fundit erdhi në mesditën e së enjtes.
E për pak minuta, Agjencia për Menaxhimin e Komplekseve Memoriale, e vendosi në vendin e vet.
Në të është shkruar një pjesë e historikut të radios “Kosova e Lirë”, e themeluar në frontet e luftës.
Kjo e fundit në marsin e vitit ‘99, u vendos brenda një bunkeri në Majën e Pallanikut të maleve të Berishës.
E kur ora shënonte 16:00, nga ky bunker dilte zëri “ju flet Kosova e lirë” të cilin e dëgjonte e gjithë bota.
E 25 vjet më pas, bunkerit të radios së luftës, po i kthehet edhe një herë pamja që e kishte.
E ai që mori pjesë në ndërtimin e parë të bunkerit, po i mbikëqyr punimet edhe në rindërtimin e tij.
“ I kam përcjell punimet nga dita e parë, kur është hedhur lopata e parë e betonit e deri në ditën e sotme, është punuar me kritere bash qysh i ka hije”, tha Rizah Berisha, realizues teknik i radios.
E pamja e luftës, bunkerit po i kthehet edhe brenda.
Investitori për përurimin e këtij bunkeri, është Agjencia për Menaxhimin e Komplekseve Memoriale.
Ndërsa punimet po bëhen nga kompania “Smakaj”.
Këta thonë se gjithçka është gati për të premten, kur do të bëhet edhe zbulimi i Obeliskut të radios së luftës.
“Punimet kanë filluar në shtatorin e vitit të kaluar, deri në dhjetorin e vitit të kaluar, kanë qenë të kryera 90% të punimeve, por për shkak të terrenit të papërshtatshëm dhe kohës me shi, janë vonuar kështu që në prill punimet kanë përfunduar 100% dhe është bërë pranimi teknik”, tha Naim Bytyqi nga kompania punëkryese.
Ndryshe më 21 qershor të vitit ’99 u transmetua edhe emisioni i fundit i kësaj radio në kushte lufte.
“Ishte data 28 mars e vitit ’99, kur ne vendosem ta ndërtojmë bunkerin e luftës, pasi që në hapësire nuk kishte më kushte për të punuar”, u shpreh Rizah Berisha.
