Një person është arrestuar nga Policia e Kosovës, pasi dyshohet se përmes rrjeteve sociale kishte kanosur ministrin në detyrë të Punëve të Brendshme, Xhelal Sveçla.
Policia e Kosovës bëri të ditur se arrestimi është realizuar më 7 korrik 2026, ndërsa rasti i kanosjes lidhet me një ngjarje të regjistruar më 9 nëntor 2025.
“Prishtinë 09.11.2025 – 16:56. Në lidhje me rastin, më 07.07.2026 është arrestuar i dyshuari, pasi i njëjti përmes rrjeteve sociale kishte kanosur Ministrin e Punëve të Brendshme të Republikës së Kosovës. Me vendim të prokurorit i dyshuari është dërguar në mbajtje”, thuhet në njoftimin e Policisë së Kosovës.
Ndërkaq, Prokuroria Themelore në Prishtinë ka konfirmuar për Tëvë1 se i dyshuari është ndaluar për 48 orë dhe se ndaj tij po zhvillohen veprimet e nevojshme hetimore.
Sipas Prokurorisë, ai dyshohet për kryerjen e veprës penale “Kanosja”, e paraparë me nenin 181 të Kodit Penal të Republikës së Kosovës.
“Referuar kërkesës suaj, ju njoftojmë se me urdhër të Prokurorit të Shtetit është ndaluar një (1) person për 48 orë për shkak se dyshohet për kryerjen e veprës penale ‘Kanosja’, nga neni 181 të Kodit Penal të Republikës së Kosovës. Në këtë drejtim Prokurori i Shtetit është duke i ndërmarrë të gjitha masat dhe veprimet e nevojshme hetimore në lidhje me këtë çështje penale”, ka deklaruar zëdhënësja e Prokurorisë Themelore në Prishtinë, Kaltrina Shala, për Tëvë1.
As Policia e Kosovës dhe as Prokuroria Themelore në Prishtinë nuk kanë bërë të ditur identitetin apo nacionalitetin e të arrestuarit. Institucionet kanë dhënë vetëm informacionet bazë për rastin, duke theksuar se hetimet lidhur me kanosjen e dyshuar të kryer përmes rrjeteve sociale janë ende në zhvillim.
