Prokuroria Themelore në Pejë ka njoftuar se, në koordinim me Policinë e Kosovës, respektivisht Njësitin për Luftimin e Krimeve Kibernetike, është arrestuar dhe ndaluar për 48 orë një person me inicialet A.B., i dyshuar për veprën penale “Materialet me përmbajtje të shfrytëzimit dhe keqpërdorimit seksual të fëmijëve”.
Sipas njoftimit të Prokurorisë, arrestimi është bërë pas një pune intensive hetimore nga organet kompetente.
“Prokuroria Themelore në Pejë njofton opinionin publik se, në koordinim me Policinë e Kosovës, përkatësisht Njësitin për Luftimin e Krimeve Kibernetike, pas një pune intensive hetimore, është arrestuar dhe ndaluar për 48 orë i dyshuari me inicialet A.B.”, thuhet në njoftim.
Gjatë operacionit policor janë sekuestruar edhe pajisje elektronike, për të cilat dyshohet se janë përdorur për kryerjen e kësaj vepre penale.
“Gjatë realizimit të operacionit janë sekuestruar edhe pajisje elektronike, për të cilat dyshohet se janë përdorur për kryerjen e veprës penale të lartcekur”, njofton Prokuroria.
Tutje, bëhet e ditur se Prokurori i Shtetit do të ndërmarrë të gjitha veprimet e nevojshme hetimore dhe procedurale në bashkëpunim me Policinë e Kosovës, me qëllim të zbardhjes së plotë të rastit.
“Prokuroria Themelore në Pejë mbetet e përkushtuar në luftimin e të gjitha formave të kriminalitetit, veçanërisht veprave penale që cenojnë integritetin dhe sigurinë e fëmijëve”, thuhet në njoftim.
