Tre persona janë ndaluar të mërkurën nga Prokuroria Themelore në Ferizaj, nën dyshimin për përfshirje në veprat penale “Legalizimi i përmbajtjes së pavërtetë në bashkëkryerje”, “Falsifikimi i dokumenteve” dhe “Keqpërdorimi i pozitës apo autoritetit zyrtar”.
Sipas Prokurorisë, aksioni është zhvilluar në bashkëpunim me Drejtorinë për Hetimin e Krimeve Ekonomike dhe Korrupsionit në Ferizaj, pas zbatimit të urdhrit të Gjykatës Themelore për kontrollin dhe sekuestrimin e përkohshëm të pronave dhe objekteve përcjellëse të të dyshuarve.
Me vendim të prokurorit, për 48 orë janë ndaluar A.S., noter në komunën e Vitisë, I.M. nga Prishtina dhe F.N. nga komuna e Dragashit.
Sipas njoftimit, ndalimi i tyre vjen si rezultat i zgjerimit të hetimeve për një rast të mëhershëm, në kuadër të të cilit ishin arrestuar edhe pesë persona të tjerë, të dyshuar për keqpërdorim të detyrës zyrtare.
Prokuroria ka bërë të ditur se hetimet po vazhdojnë dhe se do të ndërmerren të gjitha veprimet e nevojshme hetimore dhe procedurale për zbardhjen e plotë të rastit.
