Sot ka ndërruar jetë diplomati, intelektuali dhe publicisti i njohur shqiptar, Abdi Baleta.
Lajmin për ndarje nga jeta e kanë bërë të ditur miqtë dhe bashkëpunëtorët e tij, të cilët e kanë vlerësuar Baletën si një personalitet të rrallë të shqiptarisë, me veprimtari të gjerë diplomatike, intelektuale dhe shkrimore.
Ndër të parët që ka reaguar ishte hoxhë Husamedin Abazi, i cili e cilësoi atë si “burrin e madh të shqiptarisë” duke kujtuar bisedat e shumta me të dhe duke theksuar se Baleta ishte i dalluar për mbrojtjen e identitetit kombëtar.
“Allahu të mëshiroftë e të gradoftë me xhenetin firdeus i dashur Abdi, e familjes, miqve dhe lexuesëve tuaj të shumtë, ngushëllime dhe sabër e gajret”, ka shkruar ai në Facebook.
Baleta njihej për angazhimin e tij në diplomacinë shqiptare, për qëndrimet e forta kombëtare dhe për publicistikën e tij, duke lënë pas një trashëgimi të çmuar për historinë dhe kulturën shqiptare.
Abdi Baleta ka lindur në fshatin Gur i Bardh të Matit në vitin 1941, ka studiuar për marrëdhënie ndërkombëtare në Moskë dhe është diplomuar për drejtësi në Universitetin e Tiranës, në vitin 1964.
Deri në vitin në vitin 1983 ka shërbyer në diplomacinë e shtetit shqiptar si punonjës e drejtor në Ministrinë e Jashtme dhe ambasador e përfaqësues i Shqipërisë në Organizatën e Kombeve të Bashkuara (OKB).
Baleta ka kryer detyrën e kryetarit të Gjykatës së Rrethit në Pogradec (1983-1987) dhe të pedagogut të së drejtës ndërkombëtare në Fakultetin e Drejtësisë (1987-1995).
Në vitet 1991-1996 u zgjodh deputet i Partisë Demokratike në Kuvendin e Shqipërisë. Më pas, Abdi Baleta u largua nga Partia Demokratike dhe krijoi një forcë tjetër politike me emrin “Rimëkëmbja Kombëtare”. /teve1.info/
