Ministrja e Arsimit, Shkencës, Teknologjisë dhe Inovacionit (MAShTI), Arbërie Nagavci të enjten ka mbajtur konferencën e fundit për këtë vit.
Nagavci tha se po punon që të realizoj një nga një premtimet e Qeverisë, siç është mësimi dual.
Sipas ministres Nagavci, mësimi dual është më i rëndësishmi sepse kontribuon në lidhjen e njohurive të nxënësve me tregun e punës.
Nagavci ka sqaruar se në tre muajt e ardhshëm do ta kenë një plan të detajuar për punën dhe veprimet për përmirësimin e rezultateve në testin PISA.
“Siç e dini, në fillim të këtij muaji u publikuan rezultatet për Vlerësimin Ndërkombëtar të Nxënësve (PISA) 2022. Në Vlerësimin PISA 2022 u vlerësuan 6027 nxënës nga 229 shkolla; Si Ministri kemi punuar në Pakon Ligjore për ngritjen e cilësisë në shkolla; Kemi miratuar Udhëzimet administrative që e rregullojnë procesin e licencimit dhe avancimit në karrierë të mësimdhënësve, vlerësimin e performancës së mësimdhënësve dhe zhvillimin profesional të mësimdhënësve; -Prej qershorit të vitit të ardhshëm synojmë të nisim me provimin për licencë të avancuar për mësimdhënës, sipas kritereve të përcaktuara; Në tre muajt e ardhshëm do ta kemi një plan të detajuar për punën dhe veprimet për përmirësimin e rezultateve të fëmijëve tanë në testimin e radhës”, tha Nagavci.
Sipas saj, disa veprime veçse janë ndërmarrë siç janë: Fillimi i rishikimit të teksteve shkollore, miratimi i Ligjit për Edukimin në Fëmijërinë e Hershme, hartimi i Kurrikulës së re për Edukimin në fëmijërinë e hershme dhe pilotimi i saj që ka nisur javë më parë.
Nagavci tha se nga viti i ardhshëm i shkollimit parafillor do të jetë i obligueshëm për çdo nxënës. Derisa shtoi se është hera e parë që Kosova ka një kolegj publik, ai i IBCM.
Ndërkohë ajo ka përmendur edhe ndërtimin e çerdheve dhe objekteve shkollore gjatë udhëheqjes së saj me arsim.
Nagavci si sukses ka përmendur edhe ndarjen e shtesave nga Ministria për nevojat e materialeve shkollore, nga 80 euro për nxënësit e klasave të para deri në të gjashtën, dhe nga 30 euro për nxënësit e klasës së gjashtë deri në klasën e nëntë./eo/
