Shefja e Grupit Parlamentar të Lëvizjes Vetëvendosje, Arbërie Nagavci ka deklaruar se ndërprerja e seancës konstituive të Kuvendit lidhet me dy çështje, për të cilat, sipas saj, duhet të ketë sqarime.
Nagavci tha se çështja e parë ka të bëjë me kushtetutshmërinë, duke e cilësuar të papranueshme deklaratën e deputetit të Listës Serbe, Igor Simiq, i cili gjatë fjalimit të tij tha se propozimi për nënkryetar bëhet “në emër të popullit serb”.
Ndërsa për çështjen e dytë, ajo iu referua propozimeve për nënkryetarë nga PDK-ja dhe LDK-ja. Sipas Nagavcit, deklaratat e deputetëve Vlora Çitaku dhe Kujtim Shala se nuk do të marrin pjesë në votimin për presidentin rrezikojnë ta çojnë vendin drejt zgjedhjeve të reja.
“Seanca u ndërpre për dy çështje e para ka të bëjë me Kushtetutshmërinë e Kosovës dhe e dyta me propozimet e dy partive parlamentare, deklarata e deputetit Simiq ne foltoren e Kuvendit që propozimin e bënë në emër të popullit serb është e papranueshme dhe bie ndesh me Kushtetutën e vendit. E dyta propozimi i nënkryetarëve nga PDK e LDK, këta dy deputet i kemi deklaratat se të njëjtit Çitaku dhe Shala nuk do të marrin pjesë në votimin e presidentit dhe në këtë mënyrë po na qojnë drejt një palë zgjedhjeve të reja, për LVV-në është shumë e rëndësishme që të kemi edhe konstituimin e Kuvendit, zgjedhjen e Qeverisë dhe votimin e presidentit” deklaroi Nagavci në hollin e Kuvendit pas shtyrjes së seancës konstituive./teve1.info/
