Rafael Nadal e ka fituar edhe titullin e 14-të në turneun “French Open”. Spanjolli Nadal ishte i jashtëzakonshëm në finalen e zhvilluar të dielën kundër norvegjezit Casper Ruud, teksa e festoi edhe “Grand-Slamin” e 22-të në total.
Për bartësin e tetë të garës, Ruudin, finalja e Parisit ishte e para në karrierë. 36-vjeçari Nadal e fitoi meçin me lehtësi. Triumfoi në të tria setet me rezultatin 6:3, 6:3 dhe 6:0.
Pa e llogaritur finalen, Nadali në tri ndeshjet e fundit në arenat e këtij turneu, i kaloi plot 11 orë e 46 minuta. Por, lodhja nuk u vu në shprehje në finale. Madje, pas fitores në gjysmëfinale ndaj Alexander Zverevit, i cili u lëndua, Nadali kishte deklaruar se fizikisht ndihet shumë mirë.
Një tjetër e arritur e tenistit spanjoll në këtë garë, është se si 36-vjeçar, u bë fituesi më i vjetër i “Roland Garrosit”, në histori të garës.
E kaloi në këtë statistikë bashkëkombësin e tij, Andres Gimenon, që e kishte fituar turneun në vitin 1972 me 34 vjet e 10-të muaj.
Me fitoren të dielën ai tani ka dy “Grand-Slame” më shumë se zvicerani Roger Federer dhe serbi Novak Gjokoviq. Në vitin 2022 u shpall fitues edhe i turneut “Australian Open”.
