Kandidati i PDK-së për deputet, Arben Mustafa, në emisionin “Këndi i debatit” në Tëvë1, ka kritikuar politikat ekonomike të qeverisë aktuale, duke thënë se shpërndarja e ndihmave financiare nuk ka prodhuar efekt të qëndrueshëm në ekonomi.
Sipas Mustafës, instrumenti kryesor i përdorur nga qeveria gjatë mandatit të saj ka qenë ndihma e njëhershme, e cila fillimisht ishte e arsyeshme gjatë pandemisë, por sipas tij, është vazhduar pa strategji edhe pas përfundimit të krizës shëndetësore.
“Qeveria që po ikën, instrumenti i vetëm që ka mësuar gjatë qeverisjes së saj është ndihma e njëhershme. Ky instrument u aplikua gjatë pandemisë dhe u vazhdua edhe pasi pandemia kaloi, si përgjigje ndaj krizës ekonomike dhe rritjes së çmimeve. Kjo ka qenë e arsyeshme në një krizë të jashtëzakonshme, por nuk bën pjesë në mesin e instrumenteve strukturore për të luftuar inflacionin”, ka thënë Mustafa.
Ai ka kritikuar edhe menaxhimin e buxhetit, duke theksuar se qeveria ka mbajtur rezerva të larta shtetërore, por pa i kthyer ato në ekonomi përmes investimeve.
“Kemi një qeveri që ka mbajtur rezervat më të larta shtetërore, ka mbledhur taksat dhe i ka mbajtur të pashpenzuara në ekonomi. Po e thith likuiditetin nga tregu dhe nuk po ia kthen tregut prapë. Për shembull, investimet kapitale janë më të ulëtat që i ka pasur ndonjëherë Kosova”, ka deklaruar ai.
Mustafa ka shtuar se, ndonëse janë paraparë shuma të mëdha për investime kapitale, realizimi i tyre ka qenë i ulët.
“Në investimet kapitale ne parashikojmë të investojmë rreth një miliard euro në vit, por investime që realizohen. Kjo qeveri ka pasur të planifikuara rreth 900 milionë euro, por ka realizuar vetëm rreth 500 milionë euro”, ka përfunduar Mustafa.
