Në “Ditari” në Tëvë 1, Musmurati tha se si pasojë e bllokimit të OSHP-së, tri shkolla në Komunën e Prishtinës kanë mbetur pa u ndërtuar.
“Një problem i madh që e kemi është edhe bllokimi i bordit të OSHP-së, ku Qeveria e Kosovës ende nuk e ka zhbllokuar. Ky me të vërtetë është një lajm shumë i keq për qytetarët e Prishtinës, po besoj edhe për komunat e tjera, për shkak që kemi investime kapitale, projekte kapitale, të cilat janë të bllokuara në OSHP. Ne aktualisht si Komunë e Prishtinës i kemi tri shkolla, ndërtimi i tri shkollave është i bllokuar në OSHP. Kjo është për të ardhur keq. Këto tri shkolla kanë qenë të planifikuara nga administrata e kaluar në lagjen Sofalia, në lagjen Qëndresa në Veternik si dhe në lagjen Mati 1. Të gjitha shkolla tejet të nevojshme për shkak se këto tri lagje kanë shumë nevojë për infrastrukturë shkollore”, tha ajo.
Musmurati shtoi se zhbllokimi i OSHP-së është tejet me rëndësi, pasi siç thotë ajo, bllokimi i projekteve ndodh aty.
Ndonëse Qeveria e Kosovës i ka propozuar emrat për anëtarë të bordit të OSHP-së, në Kuvend nuk është votuar akoma përbërja.
Kjo situatë është përcjellur me kritika të shumta, teksa nga opozita është cilësuar edhe si dështim. /Teve1.info/
