Njohësi i çështjeve të sigurisë dhe drejtori i Institutit Octopus, Agim Musliu ka thënë se e ashtuquajtura “Zyra për Kosovën” në Qeverinë e Serbisë ka vazhduar me ndarjen e subvencioneve për qytetarë serbë që jetojnë në Kosovë.
Musliu ka deklaruar se në mesin e tyre janë më shumë se dhjetë persona të cilët kanë marrë pjesë në sulmin terrorist në Banjskë.
Kjo sipas Musliut, dëshmon se Qeveria e Serbisë po vazhdon me financimin e grupit terrorist dhe individëve të përfshirë në veprime të dhunshme kundër rendit kushtetues të Republikës së Kosovës.
Tutje, ai ka theksuar se BE dhe NATO duhet të ndërmarrin masa ndaj Serbisë, për mbështetjen e drejtpërdrejtë të terrorizmit dhe cenimin e paqes dhe stabilitetit në rajon./teve1.info/
