Njohësi i çështjeve të sigurisë dhe drejtori i Institutit Octopus, Agim Musliu ka reaguar lidhur me vendimin e Shteteve të Bashkuara për pezullimin e përkohshëm të dialogut strategjik me Kosovën.
Musliu konsideron se ky hap nuk përbën prishje të raporteve dhe as dobësim të aleancës mes dy vendeve.
Sipas tij, pezullime të tilla janë normale në marrëdhëniet mes partnerëve, derisa deklaron se sipas tij raportet Kosovë–ShBA vazhdojnë të jenë më të forta se kurrë më parë.
“Pezullimi i përkohshëm i dialogut strategjik Kosovë–ShBA nuk është as prishje e raporteve dhe as dobësim i aleancës sonë – janë gjëra që ndodhin mes partnerëve. Marrëdhëniet Kosovë–ShBA kurrë s’kanë qenë më të forta: Amerika është mbështetësja më e madhe e sovranitetit tonë, ndërsa Kosova ka popullin më pro-amerikan në botë”, u shpreh Musliu përmes një postimi në Facebook.
Ai përmendi edhe bashkëpunimin konkret mes dy vendeve, që përfshin pajisje ushtarake moderne si helikopterët “Black Hawk”, raketat “Javelin”, autoblindat dhe dronët “Puma”, si dhe programe të përbashkëta trajnimi me Gardën Kombëtare të Iowas.
Po ashtu, sipas Musliut, Kosova gëzon mbështetje të fuqishme nga ShBA në sektorin e energjisë dhe sigurisë kibernetike.
“Përveç bashkëpunimit të vazhdueshëm politik e diplomatik, kemi marrëveshje konkrete për pajisje ushtarake si helikopterët Black Hawk, raketat Javelin, autoblindat dhe dronët Puma, si dhe programe të përbashkëta trajnimi me Gardën Kombëtare të Iowas dhe mbështetje në sektorin e energjisë e sigurisë kibernetike. Kosova dhe ShBA mbeten të rreshtuara krah për krah, duke mbështetur edhe Ukrainën në luftën për liri – një dëshmi se aleanca jonë është e përhershme, e pathyeshme dhe e palëkundur”, theksoi Musliu./teve1.info/
