Sulmuesi i Kombëtares së Kosovës, Vedat Muriqi mund të luaj sërish në Superligën e Turqisë, kanë njoftuar mediumet turke të hënën.
Në fakt, thuhet se ka pasur një zhvillim të ri sa i përket të ardhmes së Muriqit, i cili është pjesë e skuadrës së Mallorcas.
Thuhet se Muriqi është i gatshëm të largohet këtë verë nga ekipi spanjoll për t’u kthyer në futbollin turk pas pesë vjetësh.
Është skuadra e Beshiktashit, që po synon transferimin e Muriqit dhe tashmë ka bërë gati edhe ofertën për kartonin e tij.
Skuadra turke do të ofrojë 5 milionë euro për ta bindur Mallorcan në lirimin e Muriqit, të cilin po e sheh si përforcim të duhur për sulmin.
31-vjeçari ka kontratë me Mallorcan deri në verën e vitit 2027, ndërsa sezonin e fundit ka shënuar 7 gola dhe ka bërë 2 asistime në 29 paraqitje në La Liga.
