Ministri në detyrë i Financave, Hekuran Murati, ka akuzuar partitë opozitare për mosvotimin e disa dokumenteve të rëndësishme financiare, përfshirë buxhetin për vitin 2026, buxhetet e tri komunave për vitin 2025, buxhetin e RTK-së, si dhe marrëveshjet ndërkombëtare në vlerë prej 1 miliard euro.
Sipas tij, kundërshtimi i opozitës nuk lidhej me përmbajtjen e këtyre projektligjeve, por me një tentim politik për të bllokuar institucionet.
“Opozita refuzoi t’i votonte: 4 miliardë euro buxhet për 2026, 1 miliardë euro marrëveshje ndërkombëtare, Buxhetin e tri komunave për 2025, Buxhetin pë RTK-në. Nuk i votuan, jo se kishin ndonjë kundërshtim me përmbajtjen, por sepse menduan që duke e bllokuar shtetin e duke i lënë qytetarët pa paga, faji do t’i mbetej Albin Kurtit”, ka shkruar Murati në Facebook.
Ai ka shtuar se qytetarët do ta mbajnë mend këtë veprim dhe do t’I dënojnë me votë me 28 dhjetor.
“Qytetarët do ta mbajnë mend këtë veprim destruktiv të partive opozitare dhe do t’ua tregojnë vendin me votë me 28 dhjetor”, ka përfunduar Murati.
