Shkollat në Prishtinë tash e disa muaj janë duke u përballur me mungesë të mësimdhënësve të gjuhës gjermane. Në shkollën e fshatit Barilevë, drejtoresha e shkollës po angazhohet që të mbaj procesin mësimor. Komuna e Prishtinës pranon se në disa shkolla kanë angazhuar studentë të gjuhës gjermane, kurse SBASHK-u thotë së shpejti pritet të ballafaqohemi edhe mungesa tjera.
Tash e tre muaj, përveç punëve menaxheriale në shkollë, drejtoresha e shkollës “Ali Kelmendi “ në fshatin Barilevë të Prishtinës ka edhe punë të tjera.
Në mungesë të arsimtares së gjuhës gjermane, drejtoresha Bedrie Pireva Shala, bashkë me psikologen e shkollës, duhet t’i bëjnë edhe aktivitetet tjera me nxënësit nga klasa e gjashtë deri në të nëntën.
Drejtoresha shprehet se e kanë të vështirë të gjejnë profesionistë të kësaj fushe, të cilët dëshirojnë të punojnë në shkolla.
E kjo situatë është duke vështirësuar procesin mësimor.
Për më pak se një vit, në këtë shkollë, e kanë lëshuar punën dy mësimdhënëse të gjuhës gjermane.
E arsyeja është pagesa e vogël që iu ofrohet në sistemin arsimor.
E jo vetëm në këtë shkollë, mungesa të tilla ka edhe në disa shkolla të tjera në komunën e Prishtinës.
Por nga kjo komunë thonë se kanë bërë një zgjidhje.
“Mungesë kemi në disa shkolla, kryesisht të fshatrave. Mungesat e mësimdhënësve deri në përfundim të procesit të rekrutimit të stafit arsimor jemi duke i mbuluar me studentë të vitit të katërt, në mungesë të kuadrove”, kanë deklaruar nga Komuna e Prishtinës.
E largimi i këtyre kuadrove nga shkollat, sipas kryetarit të Sindikatës së Bashkuar të Arsimit po ndodh për shkak të zhgënjimit të tyre me ligjin për paga.
Madje ai pret që jo vetëm mësimdhënësit e gjuhës gjermane, por edhe disa të lëndëve tjera po largohen nga sistemi arsimor.
Nga SBASHK po ashtu kanë bërë të ditur se numri i mësimdhënësve që kanë kërkuar pushim pa pagesë pas liberalizimit të vizave ka shkuar mbi 300.
