Ministria e Punëve të Jashtme dhe Diasporës e Kosovës ka mirëpritur njoftimin për arritjen e marrëveshjes së paqes ndërmjet Izraelit dhe Hamasit, duke theksuar se kjo përbën një moment të rëndësishëm dhe një hap të madh përpara drejt paqes së qëndrueshme dhe stabilitetit afatgjatë në rajon.
Në njoftim thuhet se Kosova vlerëson lidershipin e Presidentit të Shteteve të Bashkuara të Amerikës, Donald Trump, si dhe përgëzon përpjekjet ndërmjetësuese të Turqisë, Katarit dhe Egjiptit, të cilat kanë qenë thelbësore në arritjen e këtij zhvillimi historik.
“Marrëveshja përfaqëson një hap vendimtar në zbatimin e fazës së parë të nismës për paqe në Gaza të Presidentit Trump, duke mundësuar vendosjen e një armëpushimi të plotë, lirimin e pengjeve dhe zgjerimin e ndihmës humanitare për civilët në nevojë në Gaza. Republika e Kosovës rikonfirmon mbështetjen e saj të palëkundur për paqen, sigurinë dhe mbrojtjen e jetës njerëzore, dhe shpreh besimin se ky zhvillim historik do të hapë rrugën për një stabilitet të qëndrueshëm që do të sjellë përfitime për të gjithë popujt e rajonit”, thuhet në njoftim./teve1.info/
