Ministria e Punëve të Jashtme dhe Diasporës (MPJD) ka reaguar pas raportimeve lidhur me pjesëmarrjen e Kosovës në Samitin e NATO-s që pritet të mbahet në Ankara të Turqisë.
MPJD ka sqaruar se NATO është një aleancë me 32 shtete anëtare dhe se Kosova nuk merr pjesë në samite si shtet pjesëmarrës, pasi nuk është anëtare e Aleancës dhe aktualisht nuk është pjesë e Programit “Partneriteti për Paqe”.
Sipas ministrisë, ftesa në samite të NATO-s në raste të veçanta u bëhet edhe partnerëve të Aleancës, në varësi të agjendës.
“Në samitin që do të mbahet në Ankara, përveç vendeve anëtare, ftesë kanë pranuar partnerët e NATO-s në kuadër të Indo-Pacific Four (IP4) – Japonia, Koreja e Jugut, Australia dhe Zelanda e Re – si dhe Ukraina, në cilësinë e partnerit të NATO-s”, thuhet në reagimin e MPJD-së në Facebook.
MPJD ka theksuar se Kosova deri tani nuk ka marrë pjesë në samite të NATO-s si shtet pjesëmarrës.
“Pjesëmarrja e Kosovës në të kaluarën ka qenë në kuadër të aktivitetit “Women, Peace and Security” (Gratë, Paqja dhe Siguria), të organizuar nga Departamenti iShtetit i Shteteve të Bashkuara të Amerikës në margjinat e Samitit të NATO-s. Ky aktivitet ishte një ngjarje e veçantë, e organizuar paralelisht me samitin, dhe nuk përbënte pjesëmarrje në vetë Samitin e NATO-s”, theksohet në reagim.
Në fund, ministria ka ritheksuar përkushtimin e Kosovës për thellimin e bashkëpunimit me NATO dhe aspiratën strategjike për anëtarësim të plotë në Aleancë./teve1.info/
