Ministria e Punëve të Brendshme ka dënuar ashpër sulmin ndaj kryesuesit të Kuvendit të Komunës së Leposaviqit, Gorski Guriq, të cilit sot iu është djegur vetura.
MPB-ja ka thënë se ky sulm ndaj Guriqit dëshmon se Serbia nuk ka ndryshuar qasjen dhe sulmet e saj kriminale ndaj qytetarëve serbë që janë besnikë ndaj institucioneve të Kosovës.
Theksohet se ky akt është në vazhdën e djegieve të njëpasnjëshme të veturave të qytetarëve serbë që bashkëpunojnë apo angazhohen në institucionet e Republikës.
“Sulmet e tilla të Serbisë që targetojnë qytetarët serb që angazhohen në institucionet tona, synojnë që të krijojnë pasiguri tek qytetarët tanë dhe të përcjellin edhe mesazhin e fatit të atyre që duan të angazhohen në institucionet tona”, thuhet në reagim.
MPB thotë se institucionet do të vazhdojnë të jenë të hapura për angazhim dhe në shërbim të të gjithë qytetarëve pa dallim./teve1.info/