Juventusi dhe sulmuesi Alvaro Morata mund të bashkohen për herën e tretë, me spanjollin që është i gatshëm për t’u rikthyer në Torino, kanë njoftuar mediumet italiane të mërkurën.
Bëhet e ditur se Juventusi po synon transferimin e Moratas këtë verë, pasi tashmë ka nxjerr në shitje sulmuesit Moise Kean dhe Arkadiusz Milik, të cilët nuk kanë bindur me paraqitjet e tyre.
Juventusi tashmë po përgatit ofertën për ta bindur Atletico Madridin në lirimin e Moratas në fund të edicionit dhe për kartonin e tij është gati të ofrojë deri në 20 milionë euro.
Morata e njeh mirë ambientin tek Juventusi, ekip për të cilin ka luajtur në dy periudha të ndryshme dhe ka fituar dy tituj kampioni të Italisë.
31-vjeçari ka treguar paraqitje të mira këtë edicion me fanellën e Atleticos, ku ka shënuar 20 gola në 42 paraqitje në të gjitha garat. Morata ka kontratë me skuadrën spanjolle deri në verën e vitit 2026.
