Po testohet për herë të parë.
Është ky një nga kamionët e rinj të zjarrfikësve, që sot u dorëzuan për tri komuna.
Me automjete të reja tash do të pajisen njësitë e zjarrfikësve në Lipjan, Shtime e Drenas.
Kamionët u shpërndanë nga Agjencia e Menaxhimit Emergjent, në kuadër të Ministrisë së Punëve të Brendshme.
Për zjarrfikësit e Lipjanit, ky automjet zëvendëson një kamion që ishte në shërbim prej gati katër dekadash.
“Kamioni ka qenë i vitit 87 i cili i shpenzuar dhe thuajse jashtë funksionit, fatmirësisht në kohën e duhur tani e morëm këtë kamion që të mund t’iu dalim në ndihmë qytetarëve të Lipjanit dhe komunave fqinje”, tha Sadri Shumolli, zjarrfikës nga Lipjani.
Për tri komunat, investimi kap vlerën e mbi një milionë eurove.
“Sot nuk po dorëzojmë vetëm automjete, po bëjmë një investim drejtpërdrejti në sigurinë e qytetarëve. Në kuadër të këtij investimi, komuna e Lipjanit përfiton një automjet sulmues me kapacitete prej 3000 mijë litrash ujë dhe 400 litra koncentrat shkumë në vlerë prej 673 mijë e 148 euro, komuna e Shtimes dhe e Drenasit përfitojnë nga një automjet furnizues edhe sulmues të kapaciteteve prej 6000 litrave ujë, këto automjete kapin vlerën e 1,780,46 euro”, deklaroi Shefki Abdullahu, drejtor (AME)
Por, krahas pajisjeve të reja, u tha se zjarrfikësit presin edhe ndryshime në kuadër ligjor.
“Qeveria e Republikës së Kosovës, së bashku me AME kanë përgatit ligjin, infrastrukturën ligjore e cila do të përmirësonte dukshëm edhe moshën por do të përmirësonte edhe raportin që thënë me fjalë të tjera ka çalu tani e po çalon në njësitë e zjarrfikësve edhe në AME edhe ne me ligjin që fatkeqësisht ende nuk është miratuar për shkak të jo stabilitetit institucional”, theksoi Enver Dugolli, zëvëndësministër i MPB.
E në fund të ceremonisë çelësat e automjeteve iu dorëzuan sot komandantëve të njësive të zjarrfikësve në tri komunat.
