Ajo tha se është për keqardhje që fëmijët e kanë humbur mësimin më shumë se një muaj teksa theksoi se është duke u krijuar diferencim pasi që fëmijët në shkolla private e kanë filluar mësimin.
Tutje teksa foli për grevën në arsim, Mjekiqi tha se Qeveria asnjëherë nuk i ka pranuar propozimet e LDK-së për të kaluar zgjedhjen e problemeve të ndryshme.
“Është me të vërtetë për keqardhje që fëmijët tash e një muaj më tepër nuk kanë të drejtën të fillojnë mësimin… Opozita normalisht ka mundësinë për të propozuar zgjidhje të problemeve të ndryshme, por ajo që kemi parë deri tash është që rrallëherë mos të themi asnjëherë këto propozime të Lidhjes demokratike të Kosovës janë marrë parasysh nga Qeveria, qoftë për çështjen e rritjes së inflacionit ose krizës me energjinë elektrike ose çështjen e grevave sepse nuk mund të bëjmë më tepër sesa të propozojmë zgjidhje të ndryshme… Është për fatkeqësi që në shkollat private po krijohet dhe një diferencim sepse në shkollat private fëmijët e kanë filluar mësimin, ndërkaq ata në shkollat publike nuk e kanë filluar ende”, tha Mjekiqi.
Ajo po ashtu tha se LDK-ja i ka bërë ftesë Qeverisë që të dialogojë me palët e interesit dhe të gjejë një zgjidhje e cila u mundëson nxënësve të kthehen në shkolla.
“I kemi bërë ftesë Qeverisë që të dialogojë me palët e interesit e në këtë rast me sindikalistët, me mësimdhënësit në mënyrë që të gjendet një zgjidhje e cila është e pranueshme e cila ua mundëson nxënësve të Kosovës së kthehen nëpër shkolla sepse ne e dimë që cilësia e arsimit nuk është prej më të mirave në Kosovë dhe fatkeqësisht mosfillimi i mësimit me kohë konsideroj që mund të ketë një efekt negativ në afat të gjatë për mënyrën se si zhvillohet mësimi dhe sa mund të arrijnë nxënësit tonë si pasojë e mosfillimit të mësimit me kohë”, shtoi Mjekiqi./Teve1.info/
