Janë bërë më shumë se tri vite që kur Kosova ka aplikuar për anëtarësim në Bashkimin Evropian.
Përkundër që pesë shtetet e BE-së nuk e njohin ende Kosovën si shtet, javët e fundit duket se kanë ndryshuar qëndrim.
Këtë e ka bërë të ditur edhe vet komisionarja për zgjerim e BE-së, Marta Kos që i cilësoi inkurajuese zhvillimet ndaj këtyre vendeve.
Mungesa e njohjes nga Greqia, Spanja, Rumania, Sllovakia e Qipro vlerësohet si pengesa kryesore për rrugën evropiane të Kosovës.
Nga partia në pushtet, thonë se janë duke punuar në vazhdimësi që t’i bindin këto shtete për të ndryshuar qëndrimin ndaj Kosovës.
“Për shkak se qoftë ekzekutivi, qoftë legjislativi kanë bërë maksimumin për t’ua bërë me dije këtyre përfaqësuesve që qëndrimet që poi mbajnë në raport me Kosovën janë të gabuara dhe duke e argumentuar se pse ato duhet të ndryshojnë. Pra sot jemi në një situatë krejtësisht më të favorshme, madje edhe përfaqësues tjerë ndërkombëtarë e njohin këtë progres që është arritur” , ka thënë deputetja e Arbëreshë Kryeziu- Hyseni.
Kryetarja e Komisionit për Punë të Jashtme, thotë se nuk mund të bëhen publike hapat e tyre ndaj procesit të Kosovës për anëtarësim në BE.
“Jemi në një fazë të atillë që jo çdo informacion në raport me këto shtete duhet të ndahet me publikun, e rëndësishme është që përpos që po e themi ne e thonë edhe tjerët, sepse fatkeqësisht në diskursin politik në Kosovë kur Vetëvendosje thotë që jemi duke i përafruar raportet me shtetet mosnjohëse, kjo nuk besohet prej partive opozitare ndoshta edhe prej palëve të treta, por kjo po konfirmohet edhe prej BE-së dhe përfaqësuesve ndërkombëtarë”, u shpreh deputetja e LVV-së.
E nga Lidhja Demokratike e Kosovës thonë se janë të mirëseardhura këto zhvillime.
“Por, Qeveria e Kosovës duhet me qenë në ofanzivë, këtë nuk po e shohim. Ajo që po dallon tani është që Qeveria e Kosovës tani në ‘ofanzivë’ për politikën e brendshme dhe ky cikli i zgjedhjeve dhe qarku i mbyllur i krizave politike nuk është lajm i mirë për BE-në as për pesë shtetet anëtare të BE-së”, tha Haziri.
Deputeti opozitar, Lutfi Haziri vlerëson se në zvarritjen e procesit drejt anëtarësimit në BE ka qenë edhe kriza institucionale vitet e fundit.
“Burimi i stabilitetit politik ndodhet në Prishtinë, në Republikën tonë dhe mungesa e stabilitetit politik të nxjerrë prej prioriteteve nëse e përfshijmë edhe krizat, luftërat që janë rajonale e që bota është e preokupuar dhe angazhuar jashtëzakonisht shumë, por ne duhet të bëhemi burim i stabilitetit ekonomik brenda, në rajon dhe në Ballkanin Perëndimor”, shprehet deputeti i PDK-së.
Edhe kryeministri Kurti gjatë vizitës në Barcelonë të Spanjës ka deklaruar se është duke punuar në njohjen e Kosovës nga Spanja, pasi sipas tij nuk ka asnjë mosmarrëveshje mes dy shteteve.
