Ministria e Mbrojtjes dhe Forca e Sigurisë së Kosovës sot kanë marrë në menaxhim pronat e Aeroportit të fshatit Dumosh të Podujevës, për rritjen e mbrojtjes dhe sigurisë së vendit.
Sipas Maqedoncit, vendosja e ushtarëve të FSK-së në pronat e Aeroportit të Dumoshit është një zhvillim domethënës për sigurinë dhe stabilitetin në rajon.
“Kjo datë përkon edhe me ditëlindjen e Heroit të Kosovës, strategut dhe inspiruesit të luftës sonë çlirimtare, Komandant Zahir Pajazitit. Vendosja e ushtarëve të Forcës së Sigurisë së Kosovës (FSK) në pronat e Aeroportit të Dumoshit në Podujevë është një zhvillim domethënës për sigurinë dhe stabilitetin në rajon”, ka shkruar ministri në Facebook.
Tutje, ministri ka thënë se ky vendim tregon angazhimin e institucioneve të Kosovës për të kontribuar në një mjedis më të sigurt.
“Ky hap forcon praninë e FSK-së në regjionin e Llapit dhe Gollakut, duke ofruar siguri shtesë për banorët e kësaj ane si dhe për të ofruar mbështetje më të mirë dhe më të shpejtë për reagime emergjente dhe për operacione në rast të emergjencave civile. Ky vendim tregon angazhimin e institucioneve të Kosovës për të fuqizuar kapacitetet ushtarake dhe për të kontribuar në një mjedis më të sigurtë”, shkroi Maqedonci./teve1.info/
