Ministria e Bujqësisë, Pylltarisë dhe Zhvillimit Rural ka thënë se procedurat admistrative që janë duke u zhvilluar nuk i kanë në objekt fermerët, duke shtuar se procedura kanë të bëjnë ekskluzivisht me respektimin e detyrimeve ligjore nga operatorët e biznesit me ushqim dhe nuk cenojnë punën apo kontributin e fermerëve.
Në një komunikatë për media nga kjo ministri kanë thënë se respektojnë protestën e fermerëve dhe se ata janë baza e prodhimit vendor
“Veprimet e ndërmarra në sektorin e qumështit nuk janë masa kundër industrisë së përpunimit. Ato janë masa për forcimin e sigurisë ushqimore, mbrojtjen e konsumatorit dhe krijimin e kushteve të barabarta për të gjithë operatorët që veprojnë në treg. Respektimi i standardeve të sigurisë ushqimore nuk është vetëm një detyrim ligjor, por edhe një domosdoshmëri ekonomike. Cilësia e produkteve, gjurmueshmëria e lëndëve të para, deklarimi i saktë i përbërjes së produkteve dhe etiketimi transparent janë baza mbi të cilën ndërtohet besimi i konsumatorit dhe konkurrueshmëria e prodhimit vendor”, thuhet në komunikatë.
Sipas komunikatës për të mbrojtur konsumatorët dhe prodhimin vendor janë forcuar kontrollet zyrtare në kufi dhe në treg, ka intensifikuar analizat laboratorike dhe ka vendosur raportimin e detyrueshëm për lëndët e para që përdoren në sektorin e qumështit. Këto masa zbatohen në mënyrë të njëjtë për të gjithë operatorët dhe kanë për qëllim që çdo produkt të jetë në përputhje me legjislacionin në fuqi.
Fermerët kanë të drejtë të presin që qumështi i tyre të vlerësohet drejt dhe të mos zëvendësohet në mënyrë të padrejtë nga alternativa që nuk deklarohen apo nuk përdoren sipas kërkesave ligjore. Po ashtu, konsumatorët kanë të drejtë të informohen saktë për përbërjen e produkteve që blejnë.
Ministria u ka bërë thirrje të gjithë operatorëve të sektorit që të respektojnë detyrimet ligjore, të bashkëpunojnë me institucionet përgjegjëse dhe të kontribuojnë në një zgjidhje që mbron njëkohësisht fermerët, konsumatorët, industrinë përpunuese dhe prodhimin vendor.
