Ministria e Bujqësisë, Pylltarisë dhe Zhvillimit Rural, prodhuesit e qumështit dhe qumështorja “Vita” kanë arritur një marrëveshje të përkohshme pas një takimi të zhvilluar me ministrin në detyrë, Armend Muja.
Pas takimit, përfaqësuesi i Shoqatës së Qumështarëve Fidan Krasniqi, bëri të ditur se të gjitha palët janë dakorduar për hapat e mëtejmë, ndërsa Ministria dhe Agjencia e Ushqimit dhe Veterinarisë (AUV) janë zotuar se do të publikojnë sa më shpejt rezultatet e analizave të mostrave të marra.
“Në takim ishim ne prodhuesit e qumështit, shoqata po ashtu edhe përpunuesi në këtë rast qumështorja Vita. Pas një diskutimi të gjatë edhe me ministrin edhe me përpunuesin edhe me prodhuesit, u zotuan të gjithë akterët u zotuan që ministria në këtë rast më konkretisht Agjencioni për Ushqim dhe Veterinari, me një afat sa më të shpejtë do të dalin me rezultate të cilat, domethënë nga mostrat e marra nga qumështorja”, ka deklaruar ai.
Krasniqi ka thënë se vonesa në publikimin e rezultateve lidhet me faktin se mostrat nuk janë marrë vetëm në qumështoren Vita, por edhe në disa qumështore të tjera, ndërsa analizat kërkojnë kohë për shkak të specifikave të tyre.
“Arsyeja e vonesës për këto rezultate është sepse nuk është mbyllur vetëm qumështorja Vita, mostrat janë marrë edhe në shumë qumështore të tjera dhe për shkak të specifikave të analizave që do të bëhen në këto produkte, ne po shpresojmë që këto rezultate do t’i kemi sa më shpejt”, ka theksuar Krasniqi.
Ai ka njoftuar gjithashtu se qumështorja “Vita” është zotuar që nga sonte të rifillojë grumbullimin e qumështit të freskët nga fermerët.
“Nga qumështorja u zotua që nga sonte do të fillojë grumbullimi i qumështit të freskët prej fermerëve, për arsye të korrektësisë, domethënë u arrit një marrëveshje e përbashkët e përkohshme që po shpresojmë që në takimet e radhës do të zgjidhen edhe problemet e tjera të cilat i shprehën sot në forma protestive prodhuesit e qumështit”, ka përfunduar ai.
Ndryshe, sot, gjatë ditës fermerët kanë protestuar para Ministrisë së Bujqësisë duke kërkuar që të nis grumbullimi i qumështit, pasi prej katër ditësh është ndaluar përkohësisht prodhimi i tij.
Kjo protestë ka ardhur pas mbylljes së përkohshme të fabrikës “Vita” në Istog, të enjten për shkak të një aksioni inspektues nga AUV dhe Ministria e Bujqësisë.
Përfaqësuesit e qumështores “Vita”, kanë deklaruar dy ditë parë se, vendimi për pezullimin e përkohshëm të punës është marrë nga vetë kompania dhe jo nga institucionet, ndërsa kanë kërkuar nga Agjencia e Ushqimit dhe Veterinarisë (AVUK) që t’i publikojë sa më shpejt rezultatet e analizave të mostrave të marra gjatë kontrollit të fundit.
Komisioni për Monitorim dhe Ndjekje të Punës së Inspektorëve në Agjencinë e Ushqimit dhe Veterinarisë ka konstatuar dje se fabrika e qumështit “Vita” ka shkelur vendimin e ministrit në detyrë të Bujqësisë, Armend Muja të 10 majit 2026, me të cilin ndalohet përdorimi i qumështit pluhur, vajit të palmës, hirrës dhe përbërësve të tjerë në fabrikat për përpunimin e qumështit./teve1.info/
