Ishte pikërisht muaji tetor i vitit 2024, kur mori një lajm jo fort të këndshëm.
Deputetja Mimoza Kusari-Lila ishte diagnostikuar me kancer të gjirit.
Ballafaqimi me këtë sëmundje, ajo thotë se ishte sfiduese për të.
“Sfidues ka qenë në aspektin e perceptimit dhe menaxhimit me veten dhe pastaj me familjen, por menjëherë pas pajtueshmërisë dhe pas faktit të pranimit që kam qenë shumë e shpejtë në atë që të pranoj që ka ndodhë t’i marr të gjitha masat. Pastaj e ardhmja çfarë ka qenë është që sa më pak ose sa më i vogël të jetë ndikimi në funksionin tim publik”, tregon Kusari-Lila.
E kontrollet e vazhdueshme, sipas saj, kishin bërë që sëmundja të mos i lë pasoja.
“Nuk është lajm i mirë, natyrisht se askush nuk mundet ose nuk e ndjen lehtësisht informacionin që jeni diagnostikuar me sëmundje që potencialisht mund të jetë vdekje prurës. Është shumë e rëndësishme dhe unë jam e bindur që vetëm kontrollet çdo vit e ka bërë që sëmundja për mua të mos lë pasoja, ta ketë tretmanin shumë më të lehtë sesa në fazë më të avancuar”.
I gjithë ky përjetim, ka bërë që deputetja Kusari-Lila ta shoh jetën më ndryshe.
“Të shtyn të riorganizosh prioritetet, domethënë aty e sheh vlerën edhe gjerave të vogla në jetë që shpesh herë i anashkalojmë apo edhe rëndësinë e gjerave të mirëfillta dhe të sinqerta të jetës. Personalisht e kam kuptuar që shumë me e rëndësishme është raportet me njerëzit, respekti dashuria me njërin tjetrin sesa shumë gjera të tjera që vrapojnë njerëzit gjatë gjithë jetës”, u shpreh deputetja.
E sot një vit pas, ajo ka një mesazh për të gjithë të prekurit.
“Për ata që po ballafaqohen me sëmundjen e kancerit qoftë burra po gra, është shumë e rëndësishme të kenë qasjen optimiste për trajtimin që të besojnë në shërim që të gjejnë gjitha energjitë e mira të mundshme rreth vetes”.
Kusari-Lila tha për televizionin se arsyeja që e kishte shtyrë ta bënte publike sfidën e saj ishte ta sensibilizonte më shumë masën e gjerë rreth kancerit.
