Këtë vlerësim Milo e ka dhënë në emisionin “Respublika” me Zijadin Gashin në Tëvë1.
Milo ka thënë se zakonisht fjalimet e Ramës kanë një publicitet të gjerë për shkak të çështjeve që ai trajton, por edhe të veçorive dhe të mënyrës se si Rama i prezanton idetë pikëpamjet dhe qëndrimet e tij zyrtare.
“Në këtë rast, edhe fjalimi që mbajti në Asamblenë e Këshillit të Evropës ishte brenda linjave të njohura të paraqitjes së tij mediatike që kombinon qëndrimet zyrtare, çështjet e rëndësishme që kanë të bëjnë me Shqipërinë, por gjithnjë me një karakteristikë të veçantë të tij që ka të bëjë me kulturën e tij, formimin e tij, me oratorinë e tij. Pra, me pak fjalë aty shpesh shohim një kombinim të zyrtarit të lartë shqiptar me shkrimtar, me një publicist, me një orator, pse jo dhe me një artist”, u shpreh Milo.
Ish-kryediplomati shqiptar më tej tha e fjalimi i Edi Ramës ishte i drejtë në aspektin përmbajtjesor, kurse në aspektin e paraqitjes, Milo tha se Rama si artist që është di ta përdorë publikun në mënyrën më të favorshme.
“Thelbi i fjalimit ka qenë i drejtë dhe ndërkohë, paraqitja, forma, mënyra e prezantimit është diçka atipike, diçka e veçantë, diçka e lidhur me Ramën si artist që di të përdor audiencën në mënyrën më të favorshme të mundshme për të, dhe që kërkon të krijojë efekte…Duhet ta shikojmë shpeshherë Ramën jo thjeshtë si një kryeministër i Shqipërisë, apo si kryetar i Partisë Socialiste. Pra nuk duhet ta shohim thjeshtë si një politikan… Ai ka një regjizurë dhe e ndërton fjalimin dhe shfaqjen publike dhe është mjeshtër për këtë, në atë mënyrë që të ketë efektin maksimal publik”, vlerësoi Milo./teve1.info/
