Sulmuesi më i fundit që është lidhur me një transferim te Milani këtë verë është francezi Armand Kalimuendo, i cili ka shkëlqyer me fanellën e Stade Rennes.
Nuk është e fshehtë që kuqezinjtë janë në kërkim të përforcimeve në repartin ofensiv, pasi janë ndarë nga Tammy Abraham, Luka Jovic dhe Francesco Camarda.
Milani ka hasur vështirësi për të siguruar objektivat e tij kryesorë për sulmin, dhe emri më i fundit i përfolur nga Sky Sport Italia është pikërisht Kalimuendo.
Ai është një alternativë qe po merret seriozisht në konsideratë nga drejtuesit e klubit. 23-vjeçari u rrit në akademinë e të rinjve të Paris Saint-Germain dhe u shit te Stade Rennes në vitin 2022 për një shumë prej 20 milionë euro.
Që nga atëherë, ai është bërë pjesë kyçe e skuadrës franceze. Kalimuendo ka qenë titullar i përhershëm për Francën U-21 dhe pjesë e ekipit olimpik, ndërsa aktualisht ka gjashtë paraqitje me ekipin A të Francës, ku ka shënuar edhe një gol.
Në sezonin e fundit, sulmuesi qendror shënoi 18 gola dhe kontribuoi me katër asistime në 34 ndeshje zyrtare me Rennes.
Forma e tij mbresëlënëse bëri që të përmendej më parë edhe si objektiv për Juventusin.
Milani kishte mundësinë ta vëzhgonte nga afër Kalimuendon gjatë ndeshjeve të play-off-it të Ligës së Evropës në shkurt të vitit 2024.
Sipas Sky Sport Italia, nuk ka ende një ofertë konkrete, por klubi italian ka kërkuar informacione dhe është i interesuar ta studiojë më në thellësi mundësinë e transferimit të tij.
