Kombëtarja e Shqipërisë në muajin qershor do t’i luajë dy ndeshje miqësore, të cilat do të shërbejnë si përgatitje për “Euro 2024” që mbahet në Gjermani.
Gazeta nga Tirana “Panorama Sport”, të hënën i ka bërë të ditura oraret dhe stadiumet e miqësoreve të Shqipërisë.
Më 3 qershor, Shqipëria do të përballet me Lihtenshtajnin, ndeshje kjo që do të luhet në Hungari. Kjo përballje do të zhvillohet në stadiumin “Haladas SportKomplexum” me fillim në orën 20:00. Ndërkohë, më 7 qershor Shqipëria do të përballet me Azerbajxhanit, ndeshje kjo që do të luhet në të njëjtin stadium në Hungari por me fillim nga ora 19:00.
Stadiumi që ka përzgjedhur Shqipëria për këto miqësore ka një kapacitet prej 9 mijë ulëseve dhe Federata Shqiptare e Futbollit (FSHF) pret që të gjitha biletat të shiten për këto dy duele. Në Evropianin e këtij viti që mbahet në Gjermani, Shqipëria është pjesë e Grupit B së bashku me Italinë, Spanjën e Kroacinë.