Njëri nga futbollistët më të mirë në Kosovë, Mentor Zhdrella është tërhiqur nga futbolli aktiv në moshën 34-vjeçare.
“Të dashur miq. Çdo fillim e ka fundin e vetë, edhe karrierës time si futbollist i erdhi fundi. Ndihem jashtëzakonisht i lumtur sepse kam arritur ëndrrën time për të luajtur sportin që dua. Ai më dha disa nga momentet më të mira të jetës sime, më ka dhuruar shumë kënaqësi dhe suksese”, thuhet në paragrafin e parë te Zhdrellës.
Mesfushori ofensiv i dha fund karrierës 20-vjeçare. Zhdrella u shpall katër herë futbollisti më i mirë në kampionatin e Kosovës (2009, 2010, 2011, 2012).
“Ndjej kënaqësi të jashtëzakonshme kur kthej kokën mbrapa dhe shikoj atë çfarë kam bërë në futboll në këto 20 vite të kaluara, ku kam bërë shoqëri fantastike dhe shumë trofe të fituara si dhe suksese individuale të arritura. Dua të falënderoj të gjithë ata që kanë qenë pjesë e karrierës sime, të gjithë trajnerët, klubet ku kam luajtur, të gjithë bashkëlojtarët, fansat, anëtarët e familjes dhe miqtë”, shkruhet në postimin e Zhdrellës.
Karrierën e nisi tek ekipi i KEK-ut, më pas veshi fanellat e 2 Korrikut, Prishtinës, Hysit, Dritës, Feronikelit dhe Llapit.