Me këngë nacionaliste serbe, po krekoset para të pranishmëve.
Ditë më parë presidenti i Serbisë, Aleksandër Vuciq, në një festë me rastin e hapjes së segmentit të ri të autostradës Pakovraqe – Pozhegë këndoi këngë nacionaliste.
Vuçiq këndon tekstin e “Vidovdanit” , festën serbe me të cilën glorifikohet Beteja e Kosovës e vitit 1389, në praninë e ish-kryeministrit serb, Milosh Vuçeviq, njëherit lider i Partisë Progresive Serbe, si dhe drejtori i policisë Dragan Vasiljeviq.
Përveç nacionalizmit kundër Kosovës, aty u dëgjua edhe brohoritje duke thënë “NATO-ja është Serbi”.
E këto veprime të presidentit serb, ish-diplomati, Sylë Ukshini i sheh si mendësi të kohës së Millosheviqit.
“Të vazhdosh me këngën dhe diskursin e Millosheviqit edhe në vitin 2025, tregon sa e thellë është sëmundja e Serbisë dhe mjerimi politik ku është futur elita politike. Kjo nuk është vetëm një rikthim ose një lloj folklori politik primitiv, i politikës serbe, por është një rikthim te narrativa e luftës, narrativa e viteve të 90-ta që në Ballkan kanë sjellë tragjedi”, vlerëson ish- ambasadori.
Ai shton se Serbia duhet të ndërroi qasjen karshi Republikës së Kosovës.
“Në vend se Serbia, elita politike serbe të dal dhe të shikohet në pasqyre jo për të parë mitet e mesjetes por për të parë një perspektivë evropiane, ai dërgon rrëfime, këngë të cilat mbjellin urrejtje mes popujve. Popujt e vegjël siq është Serbia, kur bëjnë kërcënime të tilla, në fakt përfundojnë në tragjedi”, shprehet Ukshini.
Në anën tjetër eksperti i sigurisë, Avni Islami i sheh këto veprime si tendencë për të mbajtur gjallë nacionalizmin karshi Kosovës.
“ Veprimet e tij në një aheng duke kënduar këngë nacionaliste ai vetëm se e tregon fytyrën e vërtetë në vazhdimësi dhe asgjë nuk është e jashtëzakonshme kur kemi parasysh se, para tre muaj e gjysmë ku në një deklaratë publike tha se ne kemi planin strategjik se në moment të volitshëm mund ta sulmojmë Kosovën. Pra, nuk është diçka e re ai dhe përkrahësit e tij dihet se cfarë mendojnë për Kosovën”, thotë ai.
Ditë më parë, Aleksandër Vuciq kërcënoi hapur Kosovën pas arrestimit të Igor Popoviq, nënkryetarit të zyrës për Kosovë në qeverinë e Serbisë, i cili në Rahovec e cilësoi UÇK-në si organizatë terroriste.
