Kryetari i Partisë Demokratike të Kosovës, Memli Krasniqi, i ka vizituar kryetarët e komunave veriore: Ilir Pecin në Zveçan dhe Izmir Zeqirin në Leposaviq, të cilët vijnë nga kjo parti, raporton teve1.info
Përmes një postimi në Facebook, Krasniqi ka shkruar se kryetarët e kanë mbështetjen e tij.
“Para se gjithash, sot, Izmir Zeqiri dhe Ilir Peci janë në shërbim të qytetarëve, të komunave të tyre dhe të shtetit të Kosovës. Dhe, për këtë, ata gëzojnë mbështetjen e plotë timen dhe të Partisë Demokratike të Kosovës”, ka shkruar Krasniqi në Facebook.
Krasniqi shkroi se i ka parë nga afër vështirësitë me të cilat po ballafaqohen kryetarët dhe qytetarët.
“Sot, vizitova Zveçanin dhe Zubin Potokun, ku takova Kryetarët e këtyre dy komunave, Ilir Pecin në fshatin Kelmend dhe Izmir Zeqirin në fshatin Çabër.
Pashë nga afër sfidat dhe vështirësitë me të cilat po ballafaqohen jo vetëm Kryetarët e komunave, por edhe qytetarët shqiptarë në këto vendbanime.
Të dy kryetarët i falënderova për përkushtimin, sakrificën dhe vullnetin, që, përkundër kushteve jo adekuate, detyrën e tyre ta ushtrojnë me durim, përgjegjësi dhe në mënyrë gjithëpërfshirëse, duke kontribuar në paqe dhe shtensionim të situatës në komunat e tyre”, ka shkruar Krasniqi.
