Skuadra e Dritës është eliminuar nga garat evropiane për këtë edicion përkundër paraqitjes së mirë që e pati. Drita i ka dhënë fund aventurës evropiane në raundin e dytë kualifikues të Ligës së Konferencës. Gjilanasit janë eliminuar nga Viktoria Plzeni, që i mposhti 2:1 në ndeshjen e kthimit në stadiumin “Fadil Vokrri” për të avancuar tutje. Dueli i parë mes këtyre dy ekipeve, i luajtur javën e shkuar në Çeki pati përfunduar 0:0 dhe fitorja në ndeshjen e kthimit bëri që Plzenit të vazhdojë garat në Evropë. Të tre golat u shënuan në fund të pjesës së dytë, ndërsa Drita ndeshjen e mbylli me dy lojtarë më pak.
Blerim Krasniqi dhe Besnik Krasniqi u përjashtuan në minutat e fundit pas kartonit të dytë të verdhë. Plzeni kaloi në epërsi në minutën e 76-të, kur sulmuesi Rafiu Durosimi zhbllokoi rezultatin. Ai shënoi me kokë pas harkimit nga Lukas Kalvach. Drita reagoi me anë të rezervistit Krasniqi, i cili në minutën e dytë të kohës shtesë shënoi nga afërsia pas harkimit të Raddy Ovoukas nga krahu i djathtë. Kur pritej që ndeshja të shkonte në vazhdime, u akordua penallti për Plzenin pasi Besnik Krasniqi luajti me dorë brenda zonës. Nga penalltia ishte i saktë Erik Jirka në minutën e 113-të.
Ndeshja pati kaq shumë minuta shtesë për shkak se dy herë u ndërprerë shkakoi i problemit me njërin prej reflektorëve, i cili u ndal në dy raste dhe u lëshua sërish.
Në përgjithësi, ndeshja ishte e barabartë, ku dyja skuadrat shfaqën lojë të mirë dhe krijuan raste. Në pjesën e parë, Drita kërcënoi e para nëpërmjet Muharrem Jasharit (26’), por gjuajtja e mesfushorit prej rreth 18-të metrave shkoi pranë pingules.
Në anën tjetër, Plzeni u përpoq në minutën e 34-të ta mposht portierin Florjan Smakiqi, i cili intervenoi për ta bllokuar tentimin e Jan Kopic nga afërsia pas një kombinimi në zonë me një bashkëlojtar. Deri në fund të pjesës së parë, Blend Baftiu pati edhe një tentim në minutën e 38-të por portieri mysafir ishte në vend.
Në pjesën e dytë, Plzeni qëlloi traversën pas tentimit me kokë të Tomas Chory në minutën e 70-të, ndërsa gjashtë minuta me vonë, Almir Ajzeraj tentoi por gardiani mysafir ishte në vend. Për Dritën, kjo është hera e tretë rresht që eliminohet në këtë raund të Ligës së Konferencës.
