Ish-ministri i Mbrojtjes, Armend Mehaj, ka reaguar lidhur me deklaratën e presidentit të Serbisë, Aleksandar Vuçiq, i cili një ditë më parë tha se dërgesa e dronëve nga Turqia në Kosovë është “e paligjshme”, duke kërkuar nga Turqia që të respektojë të drejtën ndërkombëtare dhe interesat e popullit serb.
Nëpërmjet një postimi në Facebook, Mehaj ka theksuar se dëshiron t’i kujtojë Vuçiqit dhe çdo udhëheqësi tjetër serb se Kosova është shumë më e fortë ushtarakisht sesa mendohet.
Ai ka shtuar se paqja në Ballkan është e domosdoshme dhe se ajo arrihet vetëm përmes respektit dhe bashkëpunimit.
“Ndërsa sa i përket reagimeve të presidentit serb rreth ardhjes në Kosovë të dronëve kamikaz, dua t’i kujtoj Vuçiqit dhe çdo udhëheqësi tjetër serb se Kosova është shumë më e fortë ushtarakisht sesa paramendohet. Andaj, paqja në Ballkan është më se e domosdoshme, dhe kjo arrihet vetëm me respekt dhe bashkëpunim. Me këtë rast, bëjmë thirrje që Serbia ta shmangë retorikën luftënxitëse dhe një herë e përgjithmonë të shkëputet nga politika e ish diktatorit Millosheviç”, ka shkruar Mehaj.
Më tej, ai ka thënë se ekzistojnë edhe marrëveshje të tjera, të cilat sipas tij do të bëhen publike më vonë.
“Ka edhe shumë marrëveshje të tjera që do te përmenden më vonë, dhe ka shumë armatim që as në ëndërr nuk e kemi pa më parë. Këto punë i kam kryer bashkë me ekipin tim në Ministrinë e Mbrojtjes. Kosova dhe atdheu mbi të gjitha”, ka përfunduar ai.
Ndryshe, kontejnerët me mijëra dronë të avancuar kamikazë “Skydagger”, të prodhuar në Turqi, kanë mbërritur të mërkurën në Prishtinë, sipas kontratës me kompaninë e mbrojtjes “Baykar”./teve1.info/
