Mehaj në Facebook tha se gjatë këtij takimi është diskutuar për situatën e sigurisë dhe mbështetjen e pazëvendësueshme të SHBA-së për Kosovën.
“Me këtë rast, përveç diskutimit mbi situatën e sigurisë, Ambasadorit Hovenier edhe njëherë i shpreha mirënjohjen e thellë për SHBA-në në mbështetjen e pazëvendësueshme për Kosovën në ndërtimin, zhvillimin dhe avancimin e gjithmbarshëm të Ministrisë së Mbrojtjes dhe FSK-së”, tha ai.
Tutje, ministri Mehaj ritheksoi faktin se mbështetja e SHBA-së është jetike në zhvillimin e aftësive dhe kapaciteteve operacionale me forcat aleate të vendeve partnere dhe anëtare të NATO-së.
Bëhet e ditur se gjatë takimit Mehaj, njoftoi diplomatin amerikan për nivelin e përgatitjeve për stërvitjen “Defender-Europe’23” në koordinim me SHBA dhe vendet tjera aleate, si dhe vullnetin e gatishmërinë e plotë për pjesëmarrje në operacionet e përbashkëta paqeruajtëse.
“Gjithashtu, i ritheksova faktin e fuqishëm se mbështetja e deritashme e SHBA-së ka qenë dhe është jetike në zhvillimin e aftësive dhe kapaciteteve operacionale të ndërveprueshme me forcat aleate të vendeve partnere dhe anëtare të NATO-së. Gjithashtu, e njoftova edhe me nivelin e përgatitjeve për Stërvitjen “Defender-Europe’23” në bashkëpunim dhe koordinim të plotë me SHBA-në dhe vendet tjera aleate, si dhe vullnetin e gatishmërinë e plotë për pjesëmarrje në operacionet e përbashkëta paqeruajtëse”, shkroi Mehaj.
Kurse në fund ministri tha se të dy ishin të një qëndrimi që të intensifikohet edhe më tej bashkëpunimi mes dy vendeve.
“Në fund, të dy ishim të një qëndrimi që të intensifikohet edhe më tej bashkëpunimi bilateral në mes dy vendeve tona në fushën e sigurisë dhe mbrojtjes në shërbim të paqes, stabilitetit dhe sigurisë rajonale dhe më gjerë”, shkroi ai.
