Mesfushori Medon Berisha pritet të ketë një rol të rëndësishëm te skuadra e Lecces në sezonin 2025/26 në Serie A.
Klubi italian ka publikuar numrat e fanellave të futbollistëve për sezonin e ri, ndërsa Berishës i është dhënë një numër special.
21-vjeçari do ta bartë fanellën me numrin 10-të, pasi trajneri Eusebio Di Francesco ka besim të madh në Berishën.
Ai e kishte numrin 5 tek Lecce, por paraqitjet e mira në miqësoret parasezonale dhe angazhimi në stërvitje, kanë bërë që Berisha të vlerësohet lart.
Pjesë e Lecces për sezonin e ri është konfirmuar edhe mesfushori tjetër i Kombëtares së Shqipërisë, Ylber Ramadani, i cili do të vazhdojë ta bartë fanellën me numrin 20-të.
Berisha në vitin 2022 është promovuar në ekipin e parë të Lecces dhe ka kontratë deri në vitin 2028, ndërsa në Serie A ka në total 23 ndeshje të luajtura.
