Qeveria dhe opozita në Kosovë nuk kanë arritur një konsensus minimal dhe tani vendi përballet me zgjedhjet e treta parlamentare brenda 16 muajve.
Kur një situatë çohet qëllimisht drejt dështimit, edhe në Ballkan Perëndimore, fajësohen gjithmonë të tjerët. Pas dështimit të zgjedhjes së presidentit, kryeministri i Kosovës Albin Kurti akuzon opozitën duke thënë se ajo “e di që zgjedhjet nuk janë zgjidhje” dhe se “nuk duan të marrin përgjegjësi, nuk duan pushtet dhe duan që as ne të mos kemi”.
Nga ana tjetër, opozita akuzon qeverinë për mungesë të vullnetit për bashkëpunim. Ish-ministrja e Integrimeve Evropiane dhe nënkryetarja e PDK-së, Vlora Çitaku thekson se Kurti dhe partia e tij kanë marrë vetëm 51 për qind të votave, jo 100 për qind. Sipas saj, kryeministri “nuk njeh bashkëpunim dhe kompromis” dhe kërkon “nënshtrim”, gjë që PDK-ja nuk e pranon.
Mungesë marrëveshjesh mes qeverisë dhe opozitës
Në Kosovë, që nga viti 2008 shtet i pavarur, presidenti zgjidhet nga parlamenti dhe jo drejtpërdrejt nga populli. Për këtë nevojitet shumicë e thjeshtë, por me pjesëmarrjen e të paktën dy të tretave të 120 deputetëve. Pa bashkëpunim me opozitën dhe përfaqësuesit e pakicave, zgjedhja e presidentit është pothuajse e pamundur.
Pesë vjet më parë kjo u arrit me zgjedhjen e Vjosa Osmani. Por pas fitores së thellë në zgjedhjet e parakohshme të dhjetorit, Kurti – i konsideruar si lider që nuk pranon lehtë këshilla – nuk tregoi përpjekje serioze për të arritur një marrëveshje me opozitën për një kandidat konsensual.
Pas bisedimeve të pakta dhe të vonuara me PDK-në dhe LDK-në, tentativa për zgjedhjen e presidentit dështoi në fillim të marsit. Në këtë situatë, presidentja Vjosa Osmani shpërndau parlamentin dhe shpalli zgjedhje të reja. Edhe pse Gjykata Kushtetuese i dha afat shtesë deri më 28 prill, zgjedhja e presidentit dështoi sërish.
Zgjedhje për herë të tretë brenda 16 muajve
Të martën, ushtruesja e detyrës së presidentes Albulena Haxhiu thirri katër herë seanca për votim, por pa sukses, pasi munguan deputetët e opozitës dhe të Listës Serbe.
Brenda 45 ditëve, qytetarët e Kosovës do të votojnë sërish për një parlament të ri – për herë të tretë brenda 16 muajve. Kjo situatë konsiderohet problematike jo vetëm për shkak të kostove që arrijnë në miliona euro, por edhe për humbjen e kohës.
Kosova rrezikon gjithashtu të humbasë qasjen në rreth 882 milionë euro nga fondet e Bashkimit Evropian, të cilat varen nga zbatimi i reformave. Me një parlament të shpërndarë, kjo bëhet pothuajse e pamundur, shkruan Frankfurter Rundschau.
Megjithatë, pavarësisht rezultatit të zgjedhjeve të ardhshme, deputetët e rinj do të përballen me të njëjtin problem: arritjen e një marrëveshjeje për një kandidat për president që mund të pranohet nga të paktën dy të tretat e parlamentit./KP
