Drejtoria e Inspektoratit Komunal në Mitrovicën Veriore, në bashkëpunim me Inspektoratin Sanitar të Ministrisë së Shëndetësisë, ka mbyllur përkohësisht një klinikë private me licencë, pas një inspektimi të detajuar në terren.
Gjatë kontrollit, autoritetet kanë gjetur rreth 30 produkte mjekësore me afat të skaduar, duke ngritur shqetësime serioze për sigurinë e pacientëve. Po ashtu, janë evidentuar probleme në sistemin e ventilimit si dhe parregullsi në dokumentacionin e brendshëm, përfshirë mungesën e noterizimit të disa dokumenteve të rëndësishme.
“Shkeljet e identifikuara përbëjnë rrezik për shëndetin publik dhe nuk përputhen me standardet profesionale dhe ligjore,” kanë deklaruar autoritetet komunale.
Sipas njoftimit, Inspektorati Farmaceutik dhe ai Shëndetësor pritet të dalin nesër në terren për të kryer asgjësimin e artikujve të dyshimtë dhe për të vijuar hetimet lidhur me funksionimin e klinikës.
Ndërkohë, është iniciuar procedura administrative për marrjen e masave ndëshkuese, përfshirë edhe pezullimin e mundshëm të licencës, deri në përmbushjen e të gjitha kërkesave ligjore.
Autoritetet lokale kanë theksuar se “veprimet e tilla janë të domosdoshme për garantimin e sigurisë dhe cilësisë në shërbimet shëndetësore që u ofrohen qytetarëve.”
