Deputeti i zgjedhur i Aleancës, Burim Ramadani, e ka vlerësuar si skandal, mbylljen e derës së sallës plenare për deputetët e opozitës.
“Kjo natë do të mbahet mend si natë skandaloze. Nuk ka logjikë që të mbyllen dyert e sallës plenare. Dyert janë mbyllur me urdhër. Kjo është anti-Kosovë, anti-parlament. Ne kemi ftuar kryesuesin e seancës (Avni Dehari) në mënyrë zyrtare”, ka thënë Burim Ramadani për emisionin “Infonata” në Tëvë1.
Ramadani tha se deputetët e opozitës do të qëndrojnë deri në ora 24:00.
“Deputetët e Kuvendit do të presin deri në ora 24:00 kur skadon afati për konstituimin e Kuvendit. Kjo është mungesë totale të atdhedashurisë. Po flasim për zënie peng të Kuvendit”, vlerësoi Burim Ramadani.
Edhe pse afati kushtetues për seancën konstituive të Kuvendit përfundon sonte, vazhdimi i saj është caktuar për të shtunën e 8 gushtit.
Seanca konstituive e Kuvendit të Kosovës do të vazhdojë të shtunën në ora 11:00.
Njoftimi i Kuvendit ka nxitur reagime të shumta.
