Kryeministri i Kosovës, Albin Kurti, ka mbajtur sot një takim interno me kabinetin e tij në lidhje me mbarëvajtjen e projekteve dhe progresin në përmbushjen e planit strategjik-operacional e të programit qeverisës.
Kështu ka bërë të ditur për teve1.info, zëdhënësi i Qeverisë, Përparim Kryeziu, i cili thotë se takimi i sotëm nuk ka të bëjmë me arrestimet në MINT.
“Kryeministri Kurti ka zhvilluar sot një takim intern me kabinetin qeveritar, siç ishte planifikuar një javë më parë. Nuk ka të bëjë me zhvillimet e sotme”, deklaroi ai.
Kryeziu thotë se në këtë takim është diskutuar mbi mbarëvajtjen e projekteve.
“Gjatë këtij takimi u diskutua mbi mbarëvajtjen e projekteve dhe progresin në përmbushjen e planit strategjik-operacional e të programit qeverisës”, ka deklaruar ai.
Gjatë operacionit të sotëm nga Policia e Kosovës janë arrestuar dy zyrtarë të ministrisë dhe afaristi Ridvan Muharremi.
MINT thotë se mirëpret hetimet e Prokurorisë Speciale dhe se janë të bindur se furnizimi me rezerva shtetërore është bërë sipas ligjit.
Lidhur me këto zhvillime, ministrja e Industrisë, Rozeta Hajdari do të mbajë sot një konferencë për media në orën 18:00.
Në këtë konferencë, Hajdari pritet të flasë lidhur me arrestimet e fundit në MINT./teve1.info/
