Dy ditë para mbajtjes së rundit të dytë të zgjedhjeve lokale në Prishtinë, LDK dhe PDK kanë realizuar një takim.
Siç merr vesh tëvë1 nga burimet, takimi është zhvilluar pasditen e së premtes mes të parit të LDK-së, Lumir Abdixhiku dhe atij të PDK-së, Memli Krasniqi.
Pjesë e takimit bëhet se ditur se kanë qenë edhe kandidatët Përparim Rama e Uran Ismaili.
Pas këtij takimi, i cili është mbajtur në një nga restaurantet në kryeqytet, dega e PDK-së në Prishtinë mbajti këtë të shtunë mbledhje.
Ismaili pati takim me asamblistët e PDK-së, këtu në zyrët e degës qendra në Arbëri.
Asnjëri nga asamblistët nuk deshën të prononcohen pas këtij takimi.
Tëvë1 ka tentuar të marrë përgjigje dhe nga kandidati i LDK-së për kryetar të komunës së Prishtinës, Përparim Rama por i njëjti nuk është përgjigjur.
Reagim për raportimin e Tëvë1, ka bërë anëtarja e LDK-së, Jehona Lushaku duke i quajtur shpifje.
“Për disa lajme të fabrikuara mbrëmë, e vërteta ishte se Lumiri dhe Përparimi dje kanë mbajtur takimin përmbyllës të fushatës, e më pas një darkë me ekipin e Prishtinës, ku kemi qenë të gjithë bashkëpunëtorët që kemi punuar për qytetin”, deklaroi Lushaku.
Tëvë1 ka tentuar të marrë një përgjigje edhe nga PDK-ja, por të njëjtit deri në publikimin e kronikës nuk kanë kthyer përgjigje.
Analisti politik, Avdi Smajljaj ka thënë se këto marrëveshje të fshehta nuk kanë ndikim tek elektorati, për ta votuar kundërshtarin.
“Nuk është aq e lehtë që ta orientosh ose ta dërgosh pjesën më të madhe të elektoratit atë votuesin e rëndomtë që të votoj për një parti që deri dje ka qenë rivali kryesor ose përmes polarizimit kundër asaj partie ke marrë shumicën e votave dhe besoj që kjo i ka shty partitë që diku të dalin haptazi ose diku edhe fshehtas që të bëjnë koalicione mirëpo koalicionet e tilla jo shumë transparente ndoshta nuk ndihmojnë shumë orientimin e votuesve”, deklaroi ai.
Ai theksoi se koalicionet duhet të bëhen publike.
“Mbetët të shihet ky koalicioni në Prishtinë a do të konfirmohet nga partitë është apo nuk është, nëse ka pasur disa prej takimeve të tilla, por besoj se votuesit duhet ta dinë, çdo veprim i partive të jetë transparent edhe koalicionet duhet të ishin transparente”.
Në Prishtinë, në balotazh janë kryetari aktual nga LDK, Përparim Rama dhe Hajrulla Çeku nga Lëvizja Vetëvendosje.
