Të paktën 1.7 milionë njerëz llogaritet se kanë marrë pjesë në një tubim elektoral të presidentit aktual të Turqisë, Recep Tayyip Erdogan të mbajtur në Stamboll të dielën, para zgjedhjeve të 14 majit
Erdogan përshëndeti turmën masive të njerëzve në mitingun e Stambollit dhe kujtoi arritjet e qeverisë së tij gjatë 21 viteve të fundit.
Udhëheqësi turk tha se qeveria e tij ka trefishuar të ardhurat kombëtare gjatë 21 viteve të fundit. “Në 21 vjet, ne kemi siguruar punë dhe ushqim për 21 milionë njerëz që i janë shtuar popullsisë sonë. Ne ndërtuam 10.5 milionë shtëpi të reja në 21 vjet dhe u siguruam familjeve shtëpi.”
Ai kritikoi opozitën turke për retorikën e tyre armiqësore mbi dronët e prodhimit vendas dhe dronët luftarakë dhe u zotua të përmirësojë më tej industrinë e mbrojtjes së vendit.
Sa i përket energjisë, Erdogan kujtoi rezervat e gazit natyror dhe naftës me vlerë miliarda dollarë të zbuluara në Detin e Zi dhe në zonën jugore të Gabarit të Turqisë, të cilat janë vënë në dispozicion të kombit turk.
Erdogan tha gjithashtu se qeveria e tij po zbaton “Projektin e madh të tunelit të Stambollit”, i cili tha se “do të jetë tubi i tretë që do të kalojë nën Detin Marmara”, raporton Anadolu.
“Ne po përgatisim Stambollin për Shekullin e Turqisë dhe Stambolli do të jetë lokomotiva për ngritjen e Shekullit të Turqisë,” shtoi ai.
Zgjedhjet në Turqi do të zhvillohen më 14 maj. Në fletën e votimit presidencial, votuesit do të zgjedhin midis Recep Tayyip Erdogan, i cili kërkon rizgjedhjen, Kemal Kilicdaroglu, Muharrem Ince dhe Sinan Ogan.
Ndërkohë, 24 parti politike dhe 151 kandidatë të pavarur po konkurrojnë për vende në parlamentin turk prej 600 anëtarësh.
