Një gjykatë franceze ka urdhëruar Paris Saint-Germainin që t’i paguajë 61 milionë euro kompensim sulmuesit të Real Madridit, Kylian Mbappe.
Mbappe fitoi rastin ndaj PSG-së për pagat dhe bonuset e papaguara.
Gjykata bëri të ditur se PSG-ja nuk i kishte paguar Mbappes tri paga mujore.
Mbappe e paditi Parisin pasi pretendoi se nuk kishte marrë rrogë për muajin prill, maj dhe qershor të vitit 2024.
“Jemi të kënaqur me vendimin. Kjo është ajo që mund të pritet kur pagat nuk paguhen”, ka thënë avokati i Mbappes, Frederique Cassereau, shkruan të martën “Reuters”.
Ylli francez u largua nga Parisi verën e kaluar si lojtar i lirë për t’u transferuar te “Los Blancos”.
26-vjeçari Mbappe është legjendë e Parisit. Ai është edhe golashënuesi më i mirë në histori të PSG-së.
Me Parisin zhvilloi 308 ndeshje dhe kontribuoi me 256 gola dhe 110 asistime.
Mbappe është duke e kaluar edicionin e dytë te Reali.
Ai është duke shkëlqyer edhe me klubin mbretëror, ku këtë edicion ka 26 gola në 22 ndeshje në të gjitha garat.
