Ministria e Arsimit, Shkencës, Teknologjisë dhe Inovacionit ka shfuqizuar vendimet e emërimit të drejtorit të Inspektoratit të Arsimit, Dëfrim Gashi, drejtorit të Qendrës së Studentëve në Prishtinë, Fatmir Sfishta dhe drejtorit të Institutit Pedagogjik, Nezir Çoçaj, raporton teve1.info
Këshilltarja për media në MASHTI, Edona Kutleshi-Maliqaj, tha se është konstatuar se aktemërimet e tyre janë të kundërligjshme derisa tha se MASHTI ka përgjegjësi të ndërmerr veprime dhe masa të nevojshme për vendosjen e ligjshmërisë për këto pozita.
“Pas analizimit të opinionit ligjor të DMZP nr.860 të dt. 01.08.2023, legjislacionit përkatës të Shërbimit Civil, dhe aktemërimeve me afat të pakufizuar, janë identifikuar parregullsi dhe shkelje esenciale të dispozitave ligjore, si dhe zbatim të gabuar të së drejtës materiale, respektivisht Ligjit, nr.03/L-149 për Shërbimin Civil të Kosovës, sa i përket emërimit dhe kohëzgjatjes së marrëdhënies së punës në këto pozita. Pas kësaj, është marrë vendim për shfuqizimin e vendimeve.
Të njëjtëve u është dhënë mundësia që të risistemohen në pozita të ngjashme. Është obligim ligjor i MASHTI që në kuadër të kompetencave të vendosë ligjshmëri”, tha Kutleshi-Maliqaj për teve1.info.
