Ministria e Arsimit, Shkencës, Teknologjisë dhe Inovacionit (MAShTI), ka thënë se shqetësimet e ngritura për ndryshime të çmimeve në kopertinat e librave shkollor janë adresuar në Inspektoratin Qendror të Mbikëqyrjes së Tregut në kuadër të Ministrisë së Tregtisë.
Nga kjo ministri është thënë se nuk kanë pas rol në përcaktimin e çmimit, pasi nuk ka pas proces të tenderimit.
“Sa i përket ndryshimeve të çmimeve të paraqitura në kopertinat e teksteve shkollore, sqarojmë se MAShTI nuk ka pasur rol në përcaktimin e tyre, pasi nuk ka pasur proces tenderimi dhe rrjedhimisht as negocim të çmimeve. Këto shqetësime tashmë janë adresuar në Inspektoratin Qendror të Mbikëqyrjes së Tregut (në kuadër të MINT) dhe në Autoritetin e Konkurrencës. Çdo tendencë për manipulim apo përfitim të paligjshëm nga shtëpitë botuese do të trajtohet nga këto organe përkatëse, duke u ndërmarrë masat e nevojshme në kuadër të legjislacionit në fuqi”, thuhet nga MASHTI- i.
Poashtu nga kjo ministri kanë sqaruar se nxënësit e klasave VI-IX nuk kanë nevojë të blejnë tekste shkollore, pasi ato bartën nga gjenerata e kaluar dhe se detyrimi i nxënësve për të blerë këto tekste shkollore është i paligjshëm.
“Ashtu siç është njoftuar qysh në fund të vitit të kaluar shkollor, bazuar në Udhëzimin Administrativ Nr. 13/2016, nxënësit e klasave VI-IX nuk kanë nevojë të blejnë tekste shkollore, pasi ato bartën nga gjenerata e kaluar. Menaxhimin e këtij procesi e ka bërë secila shkollë dhe, sipas raportimeve të komunave, ai është zhvilluar me sukses. Çdo detyrim i prindërve për të blerë tekste për nxënësit e këtyre klasave është i paligjshëm. Subvencioni prej 80 eurosh është i destinuar vetëm për blerjen e fletoreve dhe materialeve të tjera shkollore”, thuhet nga kjo ministri.
MASHTI-i ka thënë se sa i përket furnizimin me tekste shkollore për nxënësit e komuniteteve joshumicë dhe për nxënësit me kujdestar ligjor, “theksojmë se, ashtu si në vitet e kaluara, subvencioni është i garantuar për çdo nxënës që ndjek mësimet në institucionet e Republikës së Kosovës”.
Çmime të dyfishta në libra, prindërit ankohen, shtëpia botuese: Ishte gabim teknik
