Ky libër shkollor i cili i dedikohet nxënësve të klasës së dytë kushton 3 euro.
Por ky çmim është i vendosur me ngjitës ndërsa nën të fshihet një çmim tjetër i cili është 1 euro më i ulët.
E kësisoj shtëpia botuese ka vepruar edhe me disa tekste të tjera shkollore.
Për këtë është dhënë edhe një sqarim rreth arsyeve të vendosjes së këtyre stikerëve me çmime më të larta.
“Disa prej teksteve tona shkollore kanë pasur çmime të përditësuara përmes stikerëve, sepse gjatë procesit të prodhimit të teksteve mund të ketë pasur probleme teknike gjatë printimit. Theksojmë se këto çmime përkojnë plotësisht me çmimet zyrtare të Katalogut të teksteve shkollore, të dorëzuar paraprakisht në MASHTI dhe të publikuar para fillimit të shitjeve. Të gjitha libraritë në Kosovë janë të obliguara t’i respektojnë këto çmime zyrtare gjatë shitjes”, thuhet në sqarimin e shtëpisë botuese.
Ankesa për çmimet e librave kanë edhe vetë prindërit.
“Nuk po dalin as gjysmën me i ble, shumë shtrenjtë, manipulime me çmime po ngjisin tiketa përmbi edhe qashtu katastrofë. Deri tash as gjysmën nuk i kam blerë kanë kushtuar 80 euro. Unë i bleva dy libra të gjuhës shqipe me kushtuan 13 euro, një libër kushtoj 7 euro”, shprehet Mentor Morina.
“Dikun 50 % e teksteve shkollor që po kushtojnë. Për një nxënës diku 120 euro apo rreth 130 euro”, thotë Fadil Musa
Madje këto ankesat prindërit i kanë shprehur edhe tek vet libraritë.
“Kemi pasur ankesa edhe në atë drejtim por gjeneralisht qysh ka vepruar MASHTI këtë vit është se prej klasës së 1-5 kanë subvencionuar të gjitha librat, kurse 5-9 i kanë subvencionuar vetëm për fletore pune e këto mbulohen. Ankesat gjithnjë janë të pritshme”, tha Elvin Blakaj nga libraria Dukagjini
Por sipas menaxherit të një prej librarive në vend, çmimet e librave nuk shkojnë mbi 75 euro.
“Siç e dimë të gjitha shtëpitë botuese, të gjitha shkollat që i rekomandojnë nxënësit për të blerë libra, një klasë mundet me pas disa kombinime por asnjë kombinim nuk e kalon vlerën mbi 75 euro. Ka kombime që kap vlerën 58 euro, 60 euro”, thotë Elez Morina nga libraria “Aletera”.
Tëvë 1 ka dërguar pyetje edhe në Ministrinë e Arsimit rreth ankesave të prindërve për shumën e ndarë për të blerë librat, por nuk ka marrë përgjigje deri në momentin e publikimit të kronikës.
