Nënkryetari i Lidhjes Demokratike të Kosovës, Lutfi Haziri është shprehur jashtëzakonisht kritik për mënyrën se si kryeministri i vendit, Albin Kurti ka negociuar deri me tani me Serbinë. Ai thotë se i është bërë shumë dëm Kosovës me marrëveshjen e Ohrit, andaj kërkon ndryshime në procesin e dialogut.
Kryeministri i vendit, Albin Kurti është shprehur i bindur se marrëveshja e Ohrit nuk e cenon të ardhmen e Kosovës.
Ai madje ka insistuar disa herë që kjo ujdi të nënshkruhet dhe të zbatohet në tërësi por Serbia nuk ka qenë e gatshme për një gjë të tillë.
Presidenti i Serbisë, Aleksandar Vuçiq pati deklaruar haptazi se Serbia i ka disa vija të kuqe për marrëveshjen.
E pavarësisht faktit se janë bërë disa hapa për normalizimin e marrëdhënieve me Serbinë, nënkryetari i Lidhjes Demokratike të Kosovës, Lutfi Haziri nuk vlerëson se është bërë progres i mjaftueshëm gjatë kohës sa kryeministri Kurti ka udhëhequr me vendin.
Ai madje e cilëson marrëveshjen e Ohrit si të dëmshme për Kosovën.
“Krejt çfarë ka ndodhur në këto katër vjet është një marrëveshje e keqe Kurti – Vuçiq e vitit 2023. Edhe më i keq doli të jetë draft-dokumenti në të cilin z.Kurti ka marrë pjesë në komentimin dhe ndërtimin e atij dokumenti. Dialogu është larg pritjeve që të ketë progres dhe sukses me këtë qasje”, tha Haziri.
Haziri shprehet i bindur se me LDK-në do të ndryshoj edhe qasja në dialog dhe do të parandalohen marrëveshjet e këqija siç i cilëson ai për Kosovën.
“Në do t’i parandalojmë gabimet sepse si LDK kemi kapacitet për t’i bërë gjërat siç duhet. Ne do të arrijmë me e rikthye një normalitet të rolit të Kosovës si shumicë politike ku do të vendoset një dialog me opozitën, shoqërinë civile dhe me aktorët e tjerë”, tha ai.
Takimi i fundit mes kryeministrit Albin Kurti dhe presidentit serb, Aleksandar Vuçiq është zhvilluar në shtator të vitit të kaluar në Bruksel.
Vetëm pak ditë pas atij takimi, më 24 shtator ndodhi sulmi në Banjskë të Zveçanit ku grupe të armatosura serbësh sulmuan Policinë e Kosovës dhe vranë rreshterin, Afrim Bunjaku.
