Ministri i Mbrojtjes, Ejup Maqedonci, është takuar sot me komandantin e KFOR-it, Gjeneralmajor Angelo Michele Ristuccia.
Në këtë takim, Maqedonci ka bërë të ditur se kanë diskutuar për çështjet, të cilat kanë të bëjnë me sigurinë në vend.
“Kamandant Ristuccia më uroi detyrën e re, para se të diskutonim shumë çështje të cilat kanë të bëj me sigurinë në vend. Ndër të tjerash gjatë këtij takimi theksova se si Ministër do të vazhdoj angazhimin në drejtim të forcimit të Forcës së Sigurisë së Kosovës, përmbushjes së objektivave të përcaktuara në Planin Gjithpërfshirës të Tranzicionit me qëllim garantimin e një ambienti të sigurt për të gjithë shtetasit tanë pa dallim etnie”, ka shkruar Maqedonci në Facebook.
Tutje, ai ka bërë të ditur se gjatë takimit ka përmendur thellimin e bashkëpunimit me shtetet aleate në fushën e sigurisë dhe të mbrojtjes.
“Po ashtu ritheksova se thellimi i bashkëpunimit me shtetet aleate dhe zgjerimi në përgjithësi i bashkëpunimit ndërkombëtar në fushën e sigurisë dhe mbrojtjes përbëjnë prioritet gjatë mandatit tim, pasi FSK është duke u zhvilluar me synimin e garantimin të sigurisë jo vetëm për qytetarët e saj, por gjithashtu dhe ofrimin e kontributit në sigurinë e rajonit dhe më gjerë si shtet që pretendojmë anëtarësimin në NATO, në përputhje me standardet e së cilës aleancë janë zhvilluar doktrinat ushtarake të FSK-së e po ashtu dhe po vazhdojnë investimet në armatime”, ka shkruar ministri.
Përfund, ai ka thënë se zhvillimi i ushtrisë nuk do të ndalet ashtu si dhe bashkëpunimi me aleatët./teve1.info/
